ရခိုင်သားတိ မကဇတ်တတ်တေ ဂိမ်း

လူ့ အဖွဲ့ အစည်းဆိုစွာ မတည့်ရေလူတိ အတူတူနိန်ကတ်တေ အသိုက်အမြုံတစ်ခုရာ ဖြစ်တေ။ ယင်းအတွက်နန့်  နိုင်ငံရေးလူမှုရေးပြဿနာတိကို ဖြေယှင်းကတ်တေခါ မတူရေရှုထောင့်အမြင်အယူအဆတိကို ညှိနှိုင်းတိုင်ပင်ဆွေးနွေးပေါင်းစပ်ပနာ
လူ့ အဖွဲ့ အစည်းအတွက် ဇာချင့်ရေ အကောင်းဆုံးအဖြေဖြစ်ဖို့ လဲ ဆိုစွာကို ဆုံးဖြတ်ကတ်ရရေ။

အကျယ်ချဲ့ ပြောရဖို့ ဆိုကေ နိုင်ငံရေးလူမှုရေးဆိုစွာ ဘောလုံးကဇတ်တေပိုင် ဂိမ်းတစ်ခုကဇတ်စွာနန့် လားတူရေ။ အတွေးအခေါ်မတူရေ လူတိ ကိုယ့်နိန်ရာမှာ ကိုယ်နိန်လို့  ကိုယ့်အလုပ်ကိုယ့်တာဝန်ကို အကောင်အထည်ဖော်ပြီးကေ အပီးအယူတိလုပ်ပနာ အချိတ်အဆက်လုပ်ပြီးကေ ကဇတ်ရရေ ဂိမ်းတစ်ခုဖြစ်ပါရေ။ အေပိုင် ဂိမ်းကို ကဇတ်ချင်ကေ ပထမဆုံးထား
ရဖို့ စိတ်ဓါတ်ချေက အသင်းသားစိတ်ဓါတ် (၀ါ) ငါရို့ တိစွာ ဘက်တစ်ဘက်တည်းမှာ ဟိနိန်ရေလူတိလို့  ခံယူသိဟိနားလည်ထားရရေ အသိစိတ်ပင်ဖြစ်ပါရေ။ အသင်းထဲမှာ တစ်ယောက်ပဲ့ထွက်လားစွာနန့်  တစ်သင်းလုံးဒုက္ခရောက်တတ်တေ ဆိုရေ အသိ... ယေပြီးကေ ကိုယ့်အဖွဲ့ ထဲမှာ တစ်ယောက်နန့် တစ်ယောက် ဖိုက်နိန်ကတ်ကေ တစ်သင်းလုံးအယှုံးပေါ်ပနာ အိမ်ပြန်မလှဖြစ်ကတ်ရရေ ဆိုရေ သဘောတရားကို အောက်ခြီကျကျယုံကြည်ထားခါမှ ယင်းအသင်းစွာ ပန်းတိုင်ကိုအရောက်လှမ်းလားနိုင်ဖို့  ညီညွတ်ရေး ဆိုရေ စွမ်းအားကို ရဟိလာနိုင်ပါရေ။ ငါရို့ စွာပြိုင်ဖက်တိမဟုတ် ငါရို့ စွာ ရန်သူတိမဟုတ် ဆိုရေ အတွေးအခေါ်ကို အခြီခံကျကျအကောင်အထည်ဖော်ကျင့်သုံးနိုင်ရေ လူတိစွာ နိုင်ငံရေးလူမှုရေးဂိမ်းတိကို ချန်ပီယံတိထိုင်ငိုချင်စိတ်ပေါက်လားအောင် ကျွမ်းကျွမ်းကျင်ကျင် ကဇတ်တတ်ကတ်ပါရေ။

မ၀ီးသိမ့်ရေ အတိတ်ခြီရာကို ပြန်လှန်ကြည့်ရဖို့ ဆိုကေ ဗမာတိ ကားလ်မားဇ် (Karl Marx) လီနင် (Lenin) မော်စီတုံး (Mao Zedong) ရို့ ဘားက အယူဝါဒတိကို ကော်ပီကူးယူပြီးကေ ကိုယ်ပိုင်လမ်းစိုင်လုပ်ပနာ ဗမာပြည်ကွန်မြူနစ်ပါတီထောင်ရေ။ ယင်းပါတီလက်အောက်မှာ ရခိုင်သားတိကို အရက်ဝယ်ကြက်ဖမ်း ခိုင်းစားလို့ ရအောင် အဖွဲ့ ချေထောင်ပီးထားရေ။ ကကောင်းမကြာလိုက်။ အလံနီ အလံဖြူကွဲပြီးကေ ဗမာဘားမှာ အရက်ဝယ်ကြက်ဖမ်းဆီဆွတ်နိန်ရေ ရခိုင်သားကွန်မြူနစ်တိ အချင်းချင်းတိုက်ကတ်တေ။ သတ်ကတ်တေ။ နောက်ဆုံးအဖြေက ရခိုင်သားတိသီရေ။ ရခိုင်ပြည် ထထွက်ကြီရေ။ ရခိုင်သား
ရို့ ကိုယ်ပိုင်ဂိမ်း အမျိုးသားနိုင်ငံရေးလမ်းကြောင်း ပျောက်လားခရေ။

၁၉၈၈ ကပင် အဂု ၂၀၀၉ ခုနှစ်ထိ ဗမာတိကဇတ်နိန်ရေ ဂိမ်းက ဒီမိုကရေစီအရီခြုံပနာ စတုတ္ထဗမာအင်ပါယာထူထောင်ရေးဂိမ်း ဖြစ်နိန်စွာကို တွိရရေ။ ဗမာတိ ကဇတ်နိန်ရေ အေဂိမ်းက ပညာသားပါရေ။ အကွက်စိရေ။ တော်ရုံတန်ရုံလူတိဆိုကေ
အေသူရို့ ကဇတ်နိန်ရေ ဂိမ်းနန့်  မဟာဗျူဟာနည်းဗျူဟာတိကို ကြည့်လို့ မြင်နိုင်ဖို့ မဟုတ်။ အေ ဂိမ်းကဇတ်လို့  ဗမာတိဇာချင့်ရလားလဲဆိုစွာကို လက်တွိကျကျသိချင်ကေ ရခိုင်ပြည်က ရန်ကုန်ကို တောင်ကုတ်လမ်းအတိုင်းကားစီးပြီးကေ လားကြည့်ပါ။ ရိုးတောင်ထိပ်မှာ ရခိုင်ပြည်နယ်နမိတ်ကျော်လို့  ဗမာပြည်ဖက်ကို ရောက်စွာနန့်  ဗမာတိကဇတ်နိန်ရေ ဂိမ်း၏အကျိုးရလဒ်ကို သိမြင်လားနိုင်ပါရေ။ အေထက်ပိုသိချင်ကေ အညာဖက်ကိုလားပနာ ရခိုင်ပြည်က ရရေဖေးသာနန့်  ဆောက်ထားရေ ရီလှောင်တာတမံဆည်ကြီးတိကို လားကြည့်လိုက်ပါ။ အမြင်ချေတိ ယှင်းလားနိုင်ပါရေ။

ဗမာတိကဇတ်နိန်ရေ နိုင်ငံရေးဂိမ်းကို စောစောစီးစီးသဘောပေါက်လားခရေ လူမျိုးက “၀” လူမျိုးပင်ဖြစ်ပါရေ။ “၀” တိစွာ ဗမာကွန်မြူနစ်တိနန့် ပေါင်းကြည့်ခရေ။ ယင်းအတွက်နန့်  ဗမာတိအမျိုးသားအကျိုးစီးပွါးစွာ ဇာချင့်လဲ ဇာပိုင်ဦးတည်ချက်တိထားပနာလားနိန်ကတ်လဲဆိုစွာကို အရိပ်ကျပနာ အသာချေလမ်းခွဲပြီးကေ ကိုယ့်လမ်းကြောင်းအတိုင်းကိုယ်လားခကတ်တေ။ အဂုဆိုကေ လူဦးရေ ငါးသိန်းကျော်လောက်ရာဟိရေ “၀” လူမျိုးနန့် “၀”ပြည်စွာ မြန်မာနိုင်ငံထဲက သီးခြားလွတ်လပ်တေ တိုင်းပြည်ချေတစ်ပြည်လို့  ပြောကတ်ရပါဖို့ ။

အစိုင်ပျက်လာရေ ရခိုင်သားတိက အဂုထက်ထိ ကိုယ်ပိုင်နိုင်ငံရေးဂိမ်းကို ကဇတ်ဖို့ မတတ်သိမ့်လို့ ပြောကေ လွန်လီဖို့ မထင်ပါ။ ဗမာတိနောက်ကိုလိုက်ပနာ ကိုယ့်စွာကိုယ် အမြင်ကျယ်ရေလို့ ထင်နိန်ကတ်တေ ရခိုင်သားတိကလေ့ အများကြီး။ ဂိမ်း၏သဘောသဘာဝနန့်  လိုက်နာကျင့်သုံးရဖို့  စည်းမျဉ်းကျင့်ဝတ်တိကို မသိရေ ယောင်ခြောက်ဆယ်တိပါနိန်ခြင်းက
ရခိုင်ရို့ နိုင်ငံရေးစွာ ကြည့်လို့ မကောင်းရေ ဂိမ်းပျက်တစ်ခုဖြစ်နိန်ရေ။ ပိုဆိုးနိန်စွာက ထိုလူ့ ကိုမကောင်းပြော ဒေလူ့ ကို မကောင်းပြော ရခိုင်သားအချင်းချင်းကြားမှာ မနာလိုကြီးကျလို့ အားမရသိမ့် ရခိုင်အကြောင်းကို ဗမာတိဘားမှာ လားပြီးကေ သတော်ဦးတင်သိမ့်ရေ ရခိုင်မသားတိကလေ့ တပုံကြီး။

ပိုင်ပိုင်နိုင်နိုင် ကျွမ်းကျွမ်းကျင်ကျင် နိုင်ငံရေးဂိမ်းသစ်တစ်ခုကို ကဇတ်နိုင်ဖို့  ရခိုင်သားတိမှာ ဇာချင့်တိလိုအပ်နိန်လဲ။ သေချာနိန်စွာက ဘောလုံးအသင်းတစ်သင်းအင်အားတောင့်ဖို့  ဘောလုံးသမားကောင်းတိ လိုအပ်တေပိုင် နိုင်ငံရေးဂိမ်းကို ကဇတ်ဖို့  နိုင်ငံရေးသမားကောင်းတိအများကြီးလိုအပ်တေ။ ဘောလုံးသမားကို အချေကပင် ပြုစုပျိုးထောင်မွီးမြူရရေပိုင် နိုင်ငံရေးသမားတိလေ့ အတူတူဗျာယ်။ အမျိုးသားအကျိုးစီးပွါးကိုကြည့်ပနာ ကိုယ့်အချင်းချင်းထိခိုက်နစ်နာလားအောင်မလုပ်ရ အသင်းသားစိတ်ဓါတ်အပြည့်အ၀ဟိရဖို့ ဆိုရေ ခံယူချက်ယုံကြည်ချက်နန့်  တစ်ယောက်ကိုတစ်ယောက် မဟိမဖြစ်လိုအပ်တေ နိုင်ငံရေးဂိမ်းကဇတ်ဖော်ကဇတ်ဖက်လို့  သဘောထားနိုင်ကေ အနာဂတ်မှာ ရခိုင်သားတိ ဇာဂိမ်းကိုမဆို ကဇတ်ဖို့  အဆင်သင့်ဖြစ်လာနိုင်စွာက ကျိန်းသီနိန်ပါရေ။